აღწერილობა: იმერეთში ხარობს კუნელის სამი სახე: ხუთსვეტოვანი, დახრილსვეტოვანი და წვრილფოთლოვანი, ყველა მათგანს გააჩნია სამკურნალო მნიშვნელობა. ყველა სახის კუნელის ნაყოფი არის სფეროსებრი, წითელი ან შავი, მუქი-წითელი რბილობით და 3-5-მდე კურკით, ყვავილები თეთრი, ხუთფურვლოვანია. ბუჩქი სიმაღლით აღწევს 2-3 მ-ს.

ლათინური დასახელება: Crataegus.

გავრცელება: კუნელი ძირითადად იზრდება შუამთიან ზოლში, გამეჩხერებულ ფოთლოვან ტყეებსა და ტყის პირებში.

სამკურნალო ნედლეული: ნაყოფები, ყვავილები და ფოთლები, მათგან ამზადებენ ნაყენებს და სხვა პრეპარატებს.

ქიმიური შემადგენლობა: კუნელის ნაყოფებში აღმოჩენილია ჰოლინი, ორგანული მჟავები, კაროტინი, C-ვიტამინი და სხვა ნივთიერებები.

გამოყენება: ხალხურ და მეცნიერულ მედიცინაში კუნელის პრეპარატებს იყენებენ გულის მოქმედების ფუნქციონალური დარღვევებისას, ანგინერვოზების, მოციმციმე არითმიისა და ტაქიკარდიის დროს, კუნელი ხელს უწყობს სისხლის წნევის შემცირებას, აუმჯობესებს ძილს, ადაბლებს ცენტრალური ნერვული სისტემის აგზნებას.

 

© საქართველოს მეცნიერებათა აკადემიის ქუთაისის სამეცნიერო ცენტრი. 2003.